Aqrar Subsidiya Şurası 2027-ci il üçün aqrar sektorda dövlət dəstək mexanizmlərini genişləndirərək yeni qərarlar təsdiq edib. 

“AzPolitika” “Marja”ya istinadla xəbər verir ki, Prezidentin 25 may 2026-cı il tarixli Sərəncamı ilə təsdiq edilmiş “Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı”nın hədəflərinə uyğun olaraq bitkiçilik, heyvandarlıq, balıqçılıq və emal sahələrində yeni subsidiya növləri tətbiq edilir, bəzi mövcud subsidiyalar artırılır və şərtlər sadələşdirilir.

Müasir suvarma və dağlıq rayonlara daha yüksək dəstək

Taxıl əkinləri üzrə subsidiya məbləğləri suvarma üsulu və ixtisaslaşma nəzərə alınmaqla diferensiallaşdırılıb. 22 ixtisaslaşmış rayonda müasir suvarma altında buğda əkininə ənənəvi suvarma və dəmyə üsullarından (200 AZN/ha) 2 dəfə artıq – 400 AZN/ha subsidiya ödəniləcək.

Müasir suvarma altında olan sahələrdə hər hektara ödənilən əkin subsidiyası kartof, tərəvəz, noxud, lobya və digər paxlalılar üçün 500 manata, bostan bitkiləri üçün isə 310 manata çatdırılıb. Dağlıq rayonlarda və Naxçıvan MR-də kartof və tərəvəz əkinlərinə ödənilən subsidiya müasir suvarma ilə təmin edilən sahələr üçün 600 manat/ha, digər sahələr üçün isə 400 manat/ha müəyyən edilib.

Lazer hamarlama və istixanalar üzrə yeni ödənişlər

Torpaq və su resurslarından səmərəli istifadə üçün lazer hamarlama texnologiyasını tətbiq edən fermerlərə əlavə dəstək veriləcək. Bütün suvarılan ərazilərdə bir parseldə azı 5 hektar buğda əkinindən əvvəl lazer hamarlama tətbiqinin ilk ilində əkin subsidiyası 250 AZN/ha artırılacaq. Pambıqçılıq rayonlarında eyni şərtlə məhsul subsidiyası 50 AZN/ton artırılaraq ödəniləcək. Sahələrin monitorinqində rəqəmsal və süni intellekt həllərindən istifadə olunacaq.

İstixana təsərrüfatlarının modernləşdirilməsi üçün örtük materialı və texnoloji səviyyəyə uyğun olaraq hər hektara 500 manatdan 5 000 manatadək əkin subsidiyası müəyyən edilib:

4-cü nəsil şüşə örtüklü: 5 000 manat/ha

Polikarbonat örtüklü: 3 000 manat/ha

Yüksək keyfiyyətli polietilen örtüklü 4-cü nəsil: 2 500 manat/ha

3-cü nəsil istixanalar: 2 000, 1 500 və 1 000 manat/ha

Digər polietilen örtüklü: 500 manat/ha

Yeni ixracyönümlü bitkilər və sadələşdirilmiş bağçılıq

İxracyönümlü və yüksək əlavə dəyərli bitkilərin əkinini təşviq etmək üçün Aroniya bağlarının salınmasına birdəfəlik 7 500 manat/ha, açıq sahədə efir yağı məqsədli qızılgül əkinlərinə 6 000 manat/ha subsidiya veriləcək.

Kiçik (butik) şərabçılığın inkişafı çərçivəsində 2030-cu ilədək 20 yeni butik şərab evinin yaradılması hədəflənir. Bu modeldə 5-20 ha sahədə super-intensiv üzüm bağları üçün 20 000 manat/ha, intensiv üzüm bağları üçün 10 000 manat/ha bağçılıq subsidiyası nəzərdə tutulub.

Bağçılıq üzrə şərtlər də sadələşdirilib:

Sertifikatlı ting tələbi saxlanılmaqla torpağın elektrik keçiriciliyi (EC) və viruslardan azad olma analiz tələbi ləğv edilir.

İntensiv zeytun bağlarında minimum sahə tələbi 50 hektardan 5 hektara, Naxçıvan MR-də bütün bağlar üzrə 1 hektara endirilir.

İntensiv püstə bağlarında yüksəklik həddi 1000 metrədək artırılır.

Qarabağ və Şərqi Zəngəzurda nar üzrə minimum yüksəklik tələbi ləğv edilir, zeytun üzrə maksimal yüksəklik 300 metrədək artırılır, Naxçıvanda qoz bağları üzrə minimum yüksəklik tələbi götürülür.

Pambıqçılıq, emal sənayesi və toxumçuluq

Pambıq üzrə məhsul subsidiyası suvarma üsuluna görə diferensiallaşdırılıb: ənənəvi suvarmada 200 manat/ton, sprinkler və pivot suvarmada 215 manat/ton, damcı suvarmada 300 manat/ton.

Emala təhvil verilən məhsullar üzrə yeni subsidiyalar:

Texniki üzüm: 50 manat/ton

Zeytun: 30 manat/ton

Xurma: 50 manat/ton

Taxta qabıqlı badam: 30 manat/ton

Efir yağı üçün qızılgül: 100 manat/ton

Biyan: 10 manat/ton

Pivəlik arpa: 50 manat/ton

Ərzaqlıq buğda proqramı çərçivəsində 22 ixtisaslaşmış rayonda lazer hamarlama tətbiq edilmiş sahələrdən dəyirmanlara təhvil verilən buğdaya görə 40 AZN/ton, Naxçıvan MR-də tədarükçülərə təhvil verilən buğdaya görə 50 AZN/ton məhsul subsidiyası ödəniləcək.

Toxumçuluqda yerli super-elit buğda və arpa toxumçularına əkin subsidiyası 470 manat/ha, xarici mənşəli super-elit toxumçuluğa isə 300 manat/ha artıq ödəniləcək. Buğda və arpa üzrə sertifikatlı toxum istifadəsi tələbi 5 hektara endirilib. 2026-2027-ci əkin mövsümündə sertifikatlı toxum istifadə etməyənlərin subsidiyası 50% azaldılacaq, 2027-2028 mövsümündə isə subsidiya sıfırlanacaq.

Beynəlxalq sertifikatlar və 30% avans ödənişi

Xarici bazarlara çıxışı dəstəkləmək üçün Global G.A.P., FSSC 22000, HACCP, GRASP, BRCGS, FSMA və beynəlxalq orqanik sertifikatların alınmasına 7 000 manatdan 36 000 manatadək, illik aktiv saxlama üçün isə bu məbləğin 10%-i qədər dəstək veriləcək.

İlk dəfə tətbiq edilən mexanizmlə 5-100 hektar əkin sahəsi olan, müəyyən edilmiş birillik bitkilər becərən və fermer reytinqi 30-dan yüksək olan istehsalçılar əkin subsidiyasının 30 faizini avans şəklində əvvəlcədən ala biləcəklər.

Sığorta tələbləri və güzəştlərin artırılması

Əkin subsidiyası üçün sığortalanması məcburi olan bitkilər siyahısına arpa, buğda, çəltik və qarğıdalı ilə yanaşı günəbaxan əlavə edilib, minimum sahə ölçüsü 7 hektar müəyyənləşdirilib. Yeni salınan bağların isə azı 3 il müddətinə sığortalanması tələb olunur.

Texnika və avadanlıq güzəştləri:

Kombaynlar, lazer hamarlayıcılar, soyuducu anbarlar, taxıl siloları, suvarma membranları və günəş panelləri üzrə güzəşt 50%-ədək artırılır.

Yerli damcı suvarma sistemlərində güzəşt 60%, xarici sistemlərdə 50% olacaq.

Kiçik şərabçılıq avadanlıqlarına 60%, istixana texnologiyaları və yerli konstruksiyalara 20% güzəşt tətbiq olunacaq.

Sərhədyanı yaşayış məntəqələrində əkinçiliklə məşğul olan fermerlər üçün subsidiya əmsalı respublika üzrə baza əmsalından 0,5 bənd yüksək hesablanacaq.

Balıqçılıq, yumurta, süd və heyvandarlıq dəstəkləri

İlk dəfə akvakultura üzrə məhsul subsidiyası tətbiq olunur: qızılbalıq və nərəkimilərə 2000 manat/ton, çəkikimilər və naxakimilərə 600 manat/ton ödəniləcək. Naxçıvanda süfraıik yumurta istehsalını bərpa etmək üçün tədarükçülərə satılan hər 1000 ədəd yumurtaya 30 manat subsidiya verilməsi nəzərdə tutulur.

Süd emalı müəssisələrinə təhvil verilən soyudulmuş xam südün litrinə 7 qəpik (tonuna 70 manat) subsidiya ödəniləcək. Kooperativlər vasitəsilə təhvil verilən süd üzrə məbləğ əlavə 20% artırılacaq.

Atçılıq və heyvandarlıq üzrə ödənişlər:

"Qarabağ" və "Dilbaz" atları: 2 yaşadək dayçalara 600 manat/baş, 2 yaşdan yuxarı damazlıq dişi atlara 800 manat/baş, damazlıq ayğırlara 1000 manat/baş illik subsidiya (DNT testi və çiplənmə şərti ilə).

İntensiv heyvandarlıq (1 oktyabr 2026-dan sonra): Südlük və südlük-ətlik cinslərə 1500 manat/baş, ətlik cinslərə 1000 manat/baş. Mövcud təsərrüfatlarda cins sağmallara 500 manat/baş, yerli damazlığa 800 manat/baş, mələz sağmallara 200 manat/baş (minimum 50 baş cins və ya 100 baş mələz tələbi ilə).

Xırdabuynuzlu heyvandarlıq: Azı 100 ha otlağı və 500 başdan çox heyvanı olan təsərrüfatlarda qeydiyyatdakı hər başa 4 manat.

Kökəltmə və emal: Diri çəkisi 600 kq və daha çox olan iribuynuzluların hər kq diri çəkisinə 0,40 manat. İribuynuzlu dərisinə 3 manat/ədəd, xırdabuynuzlu dərisinə 0,30 manat/ədəd, yuna 0,30 manat/kq.

Süni mayalanma subsidiyası yerli cinslərin 1-ci nəsil buzovlarına 75 manat, 2-ci və sonrakı nəsillərə 150 manat, yüksək məhsuldar cinslərin buzovlarına 50 manat, embrion köçürmədən alınan buzovlara isə 250 manat kimi diferensiallaşdırılıb.

2027-ci il üzrə əmsallar və məbləğlər barədə detallı məlumatlar www.akia.gov.az, xidmət reqlamentləri simplifies üçün www.dxr.az saytlarında yerləşdiriləcək.

“AzPolitika.info”