ABŞ Prezidenti Donald Tramp Ukrayna lideri Volodimir Zelenskinin Rusiya ilə razılaşma əldə etməsinin vacibliyini bildirib. Onun sözlərinə görə, artıq müharibəni bitirmək və kompromisə gəlmək vaxtıdır.
Ağ Evdə jurnalistlərə açıqlama verən ABŞ prezidenti qeyd edib ki, Ukrayna xalqı artıq uzun sürən bu müharibəyə dözə bilmir və Zelenski sövdələşməyə getməlidir. O, Rusiyanın hərbi resurslarına və ələ keçirdiyi ərazilərə toxunaraq, Moskvanın hərbi üstünlüyünə dair fikirlərini də dilə gətirib.
Son həftələrdə Vaşinqton və Kiyev arasında münasibətlərdə müəyyən soyuqluq müşahidə olunub. ABŞ-ın Rusiya ilə bəzi məsələlərdə addımlar atması, eləcə də Ukraynanın enerji obyektlərinə edilən hücumlar ətrafındakı müzakirələr tərəflər arasında fikir ayrılıqlarına səbəb olub.
Norveçdə ABŞ-nin xüsusi elçisi Stiv Uitkofla keçirilən görüşdən sonra Volodimir Zelenski kəşfiyyat məlumatlarının mübadiləsinin bərpa olunduğunu və irəliyə doğru diplomatik addımların atıldığını təsdiqləyib. Zelenski Ukraynanın itkilər verdiyini, lakin ədalətli sülh yolu axtardığını vurğulayıb.
Qeyd edək ki, son aylarda ABŞ-ın diqqətinin digər qlobal çağırışlara, xüsusilə İrana yönəlməsi fonunda Avropadakı müharibənin nizamlanması üzrə diplomatik proseslər müəyyən qədər ləngiyib. Buna baxmayaraq, xüsusi nümayəndələrin səviyyəsində təmaslar davam edir.
Rasim Əliyev
“AzPolitika.info”
Şərhlər