(3 may Türkçülük Gününə sevgi dolu sayqılarla)
Nurəddin İSMAYIL
Arkadaşım, can qardaşım,
dinlə məni…
Biz bir yol gəlirik,
min il əvvəl Tanrı dağdan
başlayan.
Min il əvvəl Tanrı adın
uca tutub,
haqsızlığı, yolsuzluğu
boşlayan.
Yol gəlirik,
xeyli zamandır,
Yolumuz Tanrı yolu,
Andımız Tanrı andı.
***
Biz bir yol gəlirik,
qaranlıqdan işıqlığa
yolumuzu açan
mavi gözlü qurd izi ilə.
Üzü Altaydan bəri
yovşan bitən qumsalları,
çölləri,
hər tərəfə ətir saçan,
bozqırların izi ilə.
Yol gəlirik,
xeyli zamandır,
Yolumuz Tanrı yolu,
Andımız Tanrı andı.
***
Arkadaşım, can qardaşım,
dinlə məni...
Biz budaq-budaq
olmamışdan,
gülzarını xəzan hələ
vurmamışdan,
hələ özbək, qırğız, tatar,
hələ oğuz, türkmən, qazax,
hələ kərkük, hələ qıpçaq,
hələ başqır, qaraqalpaq
olmamışdan,
bir ocaqdan közün alan
hamımız bir qövm,
bir kök idik biz.
Dünyanın harasında olsaq,
tarixlərə izin salan
türk oğlu türk idik biz.
***
Arkadaşım, can qardaşım,
dinlə məni...
Türk olmaq bizim Tanrı payımız,
Tanrıdan gəldi dünyaya səs salan
harayımız, hayımız.
Doğusundan batısına
halay vurub
kəhər atlar çapdıran,
ədalətin yer üzündə
sarsılmayan qalasını yapdıran,
min il əvvəl gələnlərin yoludur,
gəlirik xeyli zamandır,
Yolumuz Tanrı yolu,
Andımız Tanrı andı.
***
Arkadaşım, can qardaşım,
dinlə məni...
Biz bir idik,
min budağa haçalandıq.
Dərs almadıq tarixindən,
bölündük neçə yerə,
hər dəfə yenidən bir də,
bir də parçalandıq.
Canım türküm,
Can candan bu qədər
ayrı olmaz ki heç.
Bitməzsə ayrılıqlar,
Türküstanım, Turan elim
olmaz ki heç.
Sal qolların boynuma,
olum canın qurbanı.
Dur ayağa əfəndim,
yetişdi artıq Türkün zamanı.
Bu yol haqqın yoludur,
gəlirik xeyli zamandır.
Yolumuz Tanrı yolu,
Andımız Tanrı andı.
Şərhlər