Nazir müavini yıxılıb və qabırğası çatlayıb - "Müalicəsini ev şəraitində davam etdirir"

Gənclər və idman nazirinin müavini, Ağır Atletika Federasiyasının I vitse-prezidenti İsmayıl İsmayılovun səhhətində problem yaranıb.

Unikal.org-ın məlumatına görə, nazir müavini bu günlərdə paytaxtdakı xəstəxanalardan birinə yerləşdirilib.

İ.İsmayılov sözügedən sayta açıqlamasında səhhətində problem olduğunu təsdiqləyib və hazırda müalicəsini davam etdirdiyini deyib.

Gənclər və İdman Nazirliyinin mətbuat xidmətinin rəhbəri Səmayə Məmmədova isə mətbuata açıqlamasında bildirib ki, İsmayıl İsmayılov yıxılıb və qabırğası çatlayıb: "İsmayıl müəllimin qabırğası çatlayıb. Ona ilkin həkim müdaxiləsi olub”.

Məlumata görə, hadisə İsmayılov işdən çıxarkən baş verib. Onuni ayağının burxulması nəticəsində yıxıldığı bildirilir. 

Artıq İsmayılovun xəstəxanadan evə buraxıldığı, müalicəsini ev şəraitində davam etdirdiyi bildirilir. 

Nazirlik rəsmisinin sözlərinə görə, o, hazırda  müalicə alır: “Vəziyyətində ciddi nəsə yoxdur. Bir neçə gün sonra tam sağalaraq işə qayıdacaq”.

Xatırladaq ki, bir müddət əvvəl gənclər və idman naziri Azad Rəhimov da səhhətində yaranan ciddi narahatlıqla bağlı təcili ABŞ-a aparılmışdı. Nazir bununla bağlı açıqlama verərkən ağciyərindən müalicə aldığını bildirmişdi.