NAZİR DƏYİŞDİ, AMMA “TENDER SİYASƏTİ” DƏYİŞMƏDİ... - Mədəniyyət Nazirliyi həm müasir avadanlıqları, həm də odunu eyni şirkətdən necə alır?

“Stone Construction” nazirliyin “favoritinə” çevrilib

Əbülfəs Qarayevin müavini də daxil olmaqla, başının dəstəsi həbs olunanda, həmin adamlara qarşı irəli sürülən ittihamların əsas hissəsi Mədəniyyət Nazirliyinin keçirdiyi dövlət satınalmaları və tenderlərdə yol verilmiş saxtakarlıq və yeyinti faktları ilə əlaqədar idi.

Buna görə nazirlik rəsmilərilə yanaşı saxta tenderlərin qalibi olan şirkət rəhbərləri də məsuliyyətə cəlb olundular. Bu fırıldaqlarda və dövlət mülkiyyətinin talan olunmasında iştirak edənlərin bir qismi həbsə göndərildi, bir qismi də, nazir başda olmaqla, vəzifəsindən azad olundu. İstintaqda ifadə verənlər isə bu işdə nazirin birbaşa əli olduğunu sübut edən məlumatlar veriblər...

Əbülfəs Qarayev ötən ilin mayında vəzifəsindən azad olundu. İyul ayından etibarən onun yerini Anar Kərimov tutdu və o, faktiki olaraq 1 ildir ki, nazir səlahiyyətlərini icra edir. Bəs, bu müddət ərzində hansı ciddi dəyişikliklər baş verib?

Sırf mədəniyyət sahəsindəki duruma toxunmadan, nazirliyin yalnız dövlət satınalmaları və tenderlər məsələsindəki fəaliyyətinə nəzər yetirdikdə, əvvəlki rəhbərliyin “metod və üslublarına” bənzər proseslər görürük.

Belə ki, ötən gün mətbuatda Azərbaycan Respublikası Mədəniyyət Nazirliyinin struktur qurumlarına 2021-ci ildə maşın və avadanlıqların satın alınması tenderinin nəticələri dərc olunub. Məlumatda deyilir ki, 1 milyon 263 min 838 manat dəyərində tenderin qalibi "STONE CONSTRUCTİON" QSC elan edilib.

Məsələ ondadır ki, bu şirkət Azərbaycandakı “tender əjdahaları” sırasındadır. Rəsmi sənədlərdən belə aydın olur ki, şirkətin əsas müştəriləri icra hakimiyyəti orqanları və nazirliklərdir. Onların da sırasında Mədəniyyət Nazirliyi ən öndə gedir. Özü də bu şirkət necə “fərasətlidirsə”, dövlət qurumlarına “Kamaz” təkərindən tutmuş yanacaq üçün oduna qədər, dəftərxana ləvazimatından tutmuş müasir maşın və avadanlıqlara qədər, hər şey satır.

Məsələn, bu ilin aprelində "STONE CONSTRUCTİON" Xəzər rayon Mənzil-Kommunal Təsərrüfatı Birliyinin tenderinin qalibi olub. Şirkət 137 min 971 manatlıq müqavilə əsasında bu dövlət qurumuna 14 ədəd "Kamaz" təkəri, 80 ədəd "Ford" təkəri, 14 ədəd "Volvo" təkəri və 17 ədəd akumulyator satıb.

Cari ilin iyulunda isə həmin şirkət Mədəniyyət Nazirliyinin birdən-birə 5 tenderini qazanıb. Və maraqlıdır ki, ümumi dəyəri 500 min manata yaxın olan həmin tenderin nəticələrinə görə, "STONE CONSTRUCTİON” həm Bakı Şəhər Mədəniyyət Baş İdarəsinə 305 min manata(!) dəftərxana ləvazimatı, həm də Bərdə Regional Mədəniyyət İdarəsinə 66.646 manata(!) odun yanacağı satıb.

Hələ az qala yarım milyonluq dəftərxana ləvazimatının alınmasının hansı ehtiyacdan irəli gəldiyini bir tərəfə qoyaq, Bərdə Regional Mədəniyyət İdarəsinə 66 min manatlıq odun alınmasının özü bir yandan gülməli, digər yandan fantastik görünür. Bir tərəfdən belə çıxır ki, Bərdədə ümumiyyətlə, təbii qaz yoxdur deyə idarə və kəndlərdəki mədəniyyət klubları odunla qızdırılır.

Digər yandan hazırda, belə demək mümkünsə, “qara bazar”da odunun bir yük maşını 300-400 manatdır. Bu minvalla 66 min manata az qala iki yüz maşın odun düşür. Görəsən, 200 maşın odun bu idarənin nəyinə lazımdır? Bəlkə qarşıdan on illərlə davam edəcək “buz dövrü” gəlir və təbii qaz yataqlarımız quruyacaq da, bizim xəbərimiz yoxdur? Deməli, açıq görünür ki, ortada rəqəmlərin şişirdilməsinə, şirkətlə “sövdələşməyə”, saxtakarlığa dair ciddi şübhələr var...

Ümumiyyətlə, "Stone Construction” QSC 2019-cu ilin yanvar ayının 22-nə kimi Məhdud Məsuliyyətli Cəmiyyət formasında fəaliyyət göstərib. Nizamnamə kapitalı cəmi 2010 manatdır. Buna baxmayaraq, sözügedən şirkət QSC-yə çevrildikdən sonrakı qısa dövrdə dövlət qurumlarının keçirdiyi və ümumi məbləği 4 milyon 287 min 653 manat olan 17 tenderin qalibi olub.

Üstəgəl, indi də Mədəniyyət Nazirliyindən 1.2 milyonluq tender alıb. Şirkətin qalib gəldiyi tenderlərin 8-ni paytaxtın icra hakimiyyətləri, beşini isə Mədəniyyət Nazirliyinin qurumları keçirib.

Şirkətlə bağlı başqa bir ilginc məqam onun hüquqi ünvanı ilə bağlıdır. Mediada dərc olunan yazılarda "Stone Construction” MMC-nin hüquqi ünvanı Nərimanov rayonu, Ceyhun Hacıbəyli 2v 2, m.17 göstərilib. Həmin ünvanda "NT Engineering” MMC də qeydiyyata alınıb. Bu isə “tender əjdahaları” üçün xarakterik haldır – bir mənzilə bir neçə şirkət qeydiyyata salınır, axtaranda isə adətən heç birini tapmaq olmur...

Bütün bunlar onu göstərir ki, Mədəniyyət Nazirliyinin rəhbərliyindəki dəyişikliklərə rəğmən, qurumun xüsusilə tender və dövlət satınalmaları siyasətində şübhəli məqamlar qalmaqdadır. Bu sahədə səhman yaradılmadıqca dövlətin, xalqın vəsaitləri naməlum istiqamətlərə və ciblərə axmaqda davam edəcək. Nəzərə alaq ki, yeni nazirin iş başına keçdiyi artıq 1 ildən çoxdur, bu isə heç də az müddət deyil...

Cəlal Məmmədov

“AzPolitika.info” 

635x100

Şərhlər

Oxucu 2021-10-25 20:38:23

Həqiqətəndə Nazir dəyişilsədə, nazirlikdə sistem dəyişilməyib ??? Mədəniyyət idarəsinin müdirinin və musiqi məktəblərinin müdirlərinin topdağıtmaz sərvətləri var ??? Haradan olub bu sərvətlər, soruşan yoxdur ? Mədəniyyət idarəsində və Musiqi məktəblərinin müdirlərinin hər birinin altında 100,0 -200,0 manatlıq dəyərində maşınları var... Ümumiyyətlə korrupsiya bu sistemdə hökm sürür ! Köklü surətdə dəyişikliklər olmalıdır ?

Eli-ye 2021-09-24 10:54:20

Bunların çoxu qan qarışığı oıanlardır....ona görə azərbaycanlılara qısqanc baxır,bacardıqları qədər incidirlər.ı

Oxucu 2021-09-17 21:21:00

Cənab Nazir, nə üçün Şəki Mədəniyyət İdarəsinin müdirinə əl gəzdirilmir ? Mədəniyyət İdarəsi keçmiş Kolxoz İdarəsini xatırladır......

Eli 2021-09-03 17:22:06

Kul olsun bele nazirin ve ya nazirlerin başına bunların esli kökü nedir bunlar bu millettin övladlarıdır ya yox eger eledirse heç olmada biri meselen Ziya Fazil Ebülfez ya gansı biri biri heç olmada bir kili kimi ya İnsanov çıxsın Xalqın ,Milletin qabağına desin ay millet menim günahım budur başqalarının da günahlarını özleri kişdilerse özleri desin

Cəbrayıl 2021-09-03 11:41:22

Aldatmaca tenderin əsasını qoyanlar niyə ifşa olunmur?Bu məsələyə ciddi münasibətin və nəarətin yoxluğunu aradan qaldırmaq vacibdir.uzun illərdir tenderlər formal keçirilir və bir qaydaolaraq tender keçirlən müəssisələrin yaxınları,qohumları və ya rüşvət qalib gəlir.İnanmayan istənilən müəssisədə keçirilən tenderlərin nəticələrinə baxsın.Hətta iki-üç gün əvvəl açlan,maliyyə vəsaiti olmayan və ya kifayət etməyən firmaların tenderdə qalib çıdığı hallar mövcuddur.ııbv

Son yazılar