Xəbər verildiyi kimi, ölkə başçısı tərəfindən Ağdaşın icra başçısına şiddətli töhmət verilib. Bu qərar növbəti dəfə Azərbaycanda icra hakimiyyətləri idarəçiliyinin effektivlik məsələsini gündəmə gətirib.

Göründüyü kimi, icra başçılarının vəzifələrindən azad edilməsi, yerlərinin dəyişdirilməsi, töhmət alması, hətta həbs edilməsi də vəziyyəti dəyişmir və bu struktur əhalinin ən çox narazı qaldığı orqanlardan biri olaraq qalır.

Bu mövzuyla bağlı iqtisadçı Natiq Cəfərli də maraqlı paylaşım edib: “Töhmətlə, şiddətli töhmətlə, həbs etməklə, işdən çıxartmaqla olmur, düzəlmir də bu sahə - şəhər-rayon İcra Başçıları institutu ləğv edilməlidir. Bu qurum SSRİ-dən qalma mənasız, qeyri-effektiv, “birinci katib” adının dəyişdirilmiş formasıdır.

Şəhər-rayon seçkili Mer institutu təsis edilməli, hesabatlı, şəffaf yerli özünüidarə institutları yaradılmalıdır. Başqa yol yoxdur, qalib xalq şəhər, rayon, qəsəbə və kəndlərdə özünü idarə edə bilər, buna inanmaq, bu sistemə keçmək zamanıdır.

Bu gün iqtisadiyyatda yaranmış durğunluğun, geriləmənin, aqrar sektordakı problemlərin, regionlardan Bakı və Abşerona axının davam etməsinin ən böyük səbəbi məhz köhnəlmiş mərkəzi və yerli idarəetmə sistemidir – Azərbaycan qarşısında duran çağırışlara bu sistem artıq cavab verə, problemləri həll edə bilmir.

Prezident Əliyevin doğru qərarı ilə ölkədə 14 iqtisadi rayon yaradılıb, həmin iqtisadi rayonlar inzibati ərazi vahidinə çevrilməli, prezidentin şəxsi nümayəndəlik institutu Prezident adına həmin 14 ərazi vahidində Dövləti təmsil etməlidir.

Prezidentin şəxsi nümayəndəlik institutu artıq bir neçə ildir ki, öz effektivliyini sübut edir, icra başçısı institutu həm də ona görə ləğv edilməlidir ki, yerli idarəetmədə səlahiyyət və məsuliyyət bölgüsündə yaranmış hüquqi boşluqlar da aradan qaldırılsın...”

“AzPolitika.info”