Rusiya ordusu Ukraynanın Xarkov vilayətinin Çuquyev rayonunda yerləşən Peçeneqi qəsəbəsinə dəhşətli raket zərbəsi endirib. Hücum nəticəsində mülki əhali arasında çoxlu sayda həlak olan və yaralananlar var.

Xarkov Vilayət Hərbi Administrasiyasının rəhbəri Oleq Sinequbovun verdiyi son məlumata görə, dəhşətli zərbə nəticəsində ən azı 10 nəfər həlak olub, 17 nəfər isə müxtəlif dərəcəli bədən xəsarətləri alıb.

Ukrayna Prezidenti Volodimir Zelenski sosial şəbəkə hesablarında baş verən faciəyə reaksiya verərək bildirib ki, Rusiya raketi qəsəbənin insanların ən sıx olduğu mərkəzi kəsişməsinə düşüb. Zərbə birbaşa poçt şöbəsi, mağaza, kafe və yaşayış evlərinin yerləşdiyi əraziyə vurulub.

Hücum nəticəsində 10 fərdi yaşayış evi, ticarət obyektləri və mülki şəxslərə məxsus ən azı 7 avtomobil ciddi zərər görüb, ərazidə güclü yanğın baş verib. Hadisə yerinə dərhal xilasedicilər və tibb briqadaları cəlb olunub, yanğın söndürülüb.

Faciə ilə bağlı açıqlama verən Ukraynanın xarici işlər naziri Andriy Sibiqa bildirib ki, Rusiya sülhdən imtina etdiyi üçün bu müharibəni uzatmasının bədəlini əlavə sanksiyalar, təcrid olunma və ciddi məsuliyyətlə ödəməlidir.

Ukrayna Təhlükəsizlik Qüvvələrinin məlumatına görə, Rusiya tərəfi həmçinin gecə saatlarında ölkə ərazisinə 147 pilotsuz uçuş aparatı (PUA) və müxtəlif raketlərlə hücum edib. Rusiya Müdafiə Nazirliyi isə Peçeneqi qəsəbəsinə endirilən raket zərbəsini hələ ki şərh etməyib.

Rasim

"AzPolitika.info"