Ermənistan bir tərəfdən Avropa İttifaqına qoşulmağa çalışarkən, eyni zamanda Avrasiya İqtisadi İttifaqının (Aİİ) təşkil etdiyi imkanlardan istifadə etməklə bağlı yalançı siyasət yürütməyi dayandırmalıdır. 

“AzPolitika” xəbər verir ki, “RİA Novosti”-nin Rusiya Dövlət Dumasının sədri Vyaçeslav Volodindən gətirdiyi sitatda belə deyilir.

Volodin deyib: "İstərdim ki, Ermənistan yalançı siyasət yürütməyi dayandırsın, çünki əgər Ermənistan Avropa İttifaqına qoşulmaq niyyətini bəyan edən qanun qəbul edirsə, onda niyə Aİİ-nin təklif etdiyi imkanlardan istifadə edirsiniz? Niyə onun üzvlərini aldadırsınız?".

O əlavə edib ki, bu, Ermənistan tərəfindən riyakarlıqdır və səhv siyasətdir.

"Avropa İttifaqına gedirsinizmi? Gedin. Amma onda burada sizə güzəştli münasibət göstərilməməlidir", - deyə Rusiya Dövlət Dumasının sədri vurğulayıb.

Bundan öncə, avqustun 24-də Rusiya Təhlükəsizlik Şurasının sədr müavini Dmitri Medvedev Ermənistanın heç vaxt Avropa İttifaqının üzvü olmayacağını, lakin İrəvanın bu ittifaqa qoşulmaq istəyinin Rusiya və digər Aİİ ölkələri ilə münasibətlərini birdəfəlik korlayacağını demişdi.

“AzPolitika.info”