Azərbaycan bütün sahələrdə tərəqqi nümunəsinə çevrilib - Tokayev

İlham Əliyevin rəhbərliyi ilə Azərbaycan bütün sahələrdə tərəqqi nümunəsinə çevrilib.

"AzPolitika" xəbər verir ki, bunu Qazaxıstan Prezidenti Kasım-Jomart Tokayev Bakıda keçirilən Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) VII sammitində bildirib.

"Prezident İlham Əliyevin güclü rəhbərliyi altında Azərbaycan istər iqtisadiyyat, istərsə də beynəlxalq münasibətlər olsun, bütün sahələrdə tərəqqi nümunəsinə çevrilib", - o deyib..

Qazaxıstan prezidenti AQEM çərçivəsində preventiv diplomatiya mexanizminin yaradılmasını təklif edib.

K.J.Tokayevin sözlərinə görə, böhranların qarşısının alınması onların yarandıqdan sonra idarə edilməsindən xeyli effektiv və daha az xərclidir. O bildirib ki, təklif olunan mexanizm AQEM-ə üzv hər bir dövlətə qərarların qəbulu prosesində tamhüquqlu iştirak etmək və bəyannamələri razılaşdırılmış tədbirlərə çevirmək imkanı verəcək.

Bundan əlavə, Qazaxıstan Prezidenti texnologiya mübadiləsini, birgə tədqiqatların aparılmasını və suya qənaət edən həllərin tətbiqini təşviq etmək məqsədilə AQEM çərçivəsində Su Tərəfdaşlığının yaradılmasını təklif edib. O, həmçinin su ehtiyatları sahəsində qlobal gündəliyin əlaqələndirilməsi üçün BMT sistemi çərçivəsində beynəlxalq su təşkilatının yaradılmasının tərəfdarı olduğunu bildirib.

Tokayev AQEM-in mövcud beş əməkdaşlıq istiqamətinə süni intellektlə bağlı yeni istiqamətin əlavə edilməsini, eləcə də etimad quruculuğu tədbirlərinin rəqəmsal sahəyə də şamil olunmasını zəruri hesab edir.

Bundan başqa, Tokayev gələn il təhlükəsizlik və etimadın möhkəmləndirilməsi məsələlərinə həsr olunmuş tədqiqat proqramının başladılmasını təklif edib.

Onun sözlərinə görə, Qazaxıstan və Azərbaycan Xəzər dənizinin dibi ilə Transxəzər fiber-optik rabitə xəttini birgə istifadəyə verməklə mühüm mərhələni qeyd edir.