“Ukrayna hücum etsə, Belarus özünü tam Rusiya kimi aparacaq” - Lukaşenko

Rusiyalı teleaparıcı Vladimir Solovyovun "əgər onlar (Ukrayna) Donbasa qarşı müharibəyə başlasa, onda Belarus ordusu özünü necə aparacaq?" sualına prezident Aleksandr Lukaşenko cavab verib ki, "Rusiya özünü necə aparacaqsa tam elə".

Jurnalistin "yəni bu birgə cavab olacaq?" sualına Lukaşenko “əlbəttə” cavabını verib. “Biz burada cənub sərhəddində zarafatmı edirik, mənim bunu sizə izah etməyimə ehtiyac yoxdur" - deyə Lukaşenko bildirib.

Rusiya hərbçilərinin Ukrayna ilə sərhəddən çox da uzaq olmayan Belarusda yerləşdirilməsinə gəlincə rəsmi olaraq Minsk və Moskva Rusiya ordu birləşmələrinin Belarusa göndərilməsini fevralın 10-dan 20-dək keçiriləcək birgə təlimlərdə iştirakla izah edir.

ABŞ və müttəfiqləri hesab edirlər ki, Rusiya Ukrayna ilə sərhədlərə qoşun toplamaqla bu ölkəyə silahlı basqın hazırlaya bilər. Bu ölkələr Kiyevə ən yaxın yerdən - Belarusdan da hücumun mümkünlüyü ilə bağlı narahatlıqlarını ifadə edirlər.

Rusiya işğala hazırlaşdığını qəti şəkildə inkar edir. Eyni zamanda, Rusiya rəsmiləri, o cümlədən prezident Vladimir Putin dəfələrlə Rusiyanın Donbasda Ukraynanın mümkün hücumuna güclə cavab verəcəyinə işarə ediblər. Ukrayna belə bir hücum planlarını rədd edir.

Kiyevdə və Qərbdə Rusiyanın Ukrayna qoşunlarının işğala haqq qazandırmaq üçün aqressiv hərəkətlər edə biləcəyi ilə bağlı qorxular var. Kiyev Lukaşenko rejimini 2020-ci ildə Minskdə kütləvi etirazları yatırtmaqda ittiham edəndən sonra iki ölkə arasında münasibətlər xeyli pisləşib.

“AzPolitika.info”