Ermənistanın birinci prezidenti Levon Ter-Petrosyanın 23 iyul 1993-cü ildə Qarabağda qətliamlar törədən və mülki azərbaycanlılara qarşı amansız davranan “Yerkrapa” terrorçu qruplaşması qarşısında etdiyi çıxışı önəmli faktları ortaya çıxarıb. 

Eks-prezidentin səsləndirdiyi fikirlər ermənilərin milli strategiyası və hədəflərini anlamaq, onların hansı amallar uğrunda yaşamasını başa düşmək üçün yol xəritəsidir. 

Petrosyan cinayətkar dəstəyə “qardaşlarım” deyə səslənir, 1988-ci ildən azərbaycanlılara qarşı silahlı hərəkata başladıqlarını və qətliamlar həyata keçirdiklərini etiraf edir: "Biz 600 ildir erməni xalqının bacarmadığını həyata keçirdik. Bütün Ermənistanı və Qarabağı digər millətlərdən tamamilə təmizlədik".

Petrosyan 1988-ci ilə qədər Ermənistanda 170 min azərbaycanlının yaşadığını xatırladır. Qeyd edir ki, əgər onlar Ermənistanda qalsaydı, bizim dövlətimiz olmayacaqdı: “Biz onda şimal-şərq rayonlarını, Göyçəni müdafiə edə bilməyəcəkdik. Azərbaycanlılar 3 rayonda çoxluq təşkil edirdilər. Bu, Basarkeçər, Zəngibasar və Amasyadır. Bu problem həll edildi və bu, göydən hədiyyə kimi düşmədi. Bunu biz etdik – milli hərəkat etdi, erməni ümummilli hərəkatı və onun hərbi qanadı, özünümüdafiə batalyonları, bizim “Yerkrapa” dəstəsi”. 

Ermənistanın keçmiş rəhbəri bildirir ki, Zəngəzurda azərbaycanlıların çoxluq təşkil etməsi “böyük Ermənistan”ın qurulması üçün təhdid idi. O, terror dəstəsinə təriflər yağdırır və “Ermənistan sizin sayənizdə təmizləndi” deyir. 

Petrosyan ikinci uğur kimi Azərbaycandan 500 min erməninin köçürülməsini göstərir. O bildirir ki, əgər onlar Azərbaycanda qalsaydı, Ermənistana təzyiq vasitəsinə çevriləcəkdilər. Hayların birinci prezidentinin bu etirafları faşizmin, terrorizmin və terrorçuların maliyələşdirilməsinin bu dövlətin siyasətinin özəyini təşkil etdiyini bir daha sübuta yetirir.