“ADDIM ATIRDIM, PUL İSTƏYİRDİLƏR...” - Hakim prosesdə bu hospitalda müalicə edildiyi günlərı xatırladı + FOTO

Talassemiyalı uşaqlar üçün toplanmış 1 milyonu ələ keçirməkdə ittiham olunan Nuridə Seyidova, Aynur Bayramova və Aysel Məmmədovanın cinayət işi üzrə məhkəmənin növbəti prosesi keçirilib.

"AzPolitika"nın “qafqazinfo”ya istinadən verdiyi məlumata görə, Bakı Ağır Cinayətlər Məhkəməsindəki bugünkü iclasda xanımların əməlindən zərərçəkənlər dindirilib.

Zərərçəkmişlərdən biri bu cinayətə görə həyat yoldaşını itirdiyini deyən Kamil Əhmədovdur. Kamilin həyat yoldaşı qaraciyər xəstəliyindən əziyyət çəkib. Onu hazırda təqsirləndirilənlərlə Mərkəzi Gömrük Hospitalının həkimi Mir Cəlal Kazımi tanış edib: “Mir Cəlal həkim ilk müayinədən sonra yoldaşımın sirrozdan əziyyət çəkdiyini dedi. Bir müddət sonra əlavə xəstəliklər ortaya çıxdı. İlk dəfə Mir Cəlal həkim həyat yoldaşımı bağırsaqdan əməliyyat etdi. Üstündən bir müddət keçəndən sonra zəng elədi ki, bəs, təcili qaraciyər köçürülməsi olmalıdır. Bunun üçün də donoru biz tapmaq şərti ilə 46 min manat lazımdır. Guya bizə köməklik üçün bir nəfər xeyriyyəçini təklif etdi. Aysel Məmmədovanın nömrəsini verdi. Aysellə ilk danışığımız çox ümidverici oldu. Dedi ki, 23 min manat siz verirsiniz, qalan 23 minini də biz qarşılayırıq. Mən də dərhal həmin pulu verdim”.

Kamilin sözlərinə görə, pulu verəndən sonra iş uzanmağa başlayıb. Hər dəfə müxtəlif bəhanələrlə əməliyyat yubadılıb: “Bunlardan bir nəticə əldə edə bilmədiyimizi görüb evimi sataraq pulu düz-qoş elədim. Həmin pulla Mir Cəlal həkim həyat yoldaşımı əməliyyat elədi. Amma bir neçə gün sonra yoldaşım elə xəstəxanada vəfat etdi.Artıq 23 min manatın 10 minini Ayselin atası ödəyib. Qalan 13 mini də ondan tələb edirəm”.

Aysel Məmmədova bildirib ki, həmin pulu Nuridə Seyidovaya çatdırması üçün onun Fizuli adlı sürücüsünə təqdim edib.

Nuridə Seyidova sürücüsünə verildiyi iddia olunan pulu əldə etmədiyini deyib.

Zərərçəkmişin başına gətirilənlər cinayət işini araşdıran hakim Azad Məcidovu da hiddətləndirib. Hakim özünün də Mərkəzi Gömrük Hospitalında müalicə edildiyi günləri xatırlayıb: “O vaxt mən koronavirusa yoluxmuşdum. Vəziyyətim pis idi. Belə qərara gəldik ki, Gömrük Hospitalında müalicə alım. Təsəvvür edirsiniz, hara addım atırsan, pul istəyirdilər. Pulsuz adama salam da vermirdilər. 41 dərəcə qızdırmada idim. Deyirəm ölürəm, yardım edin, baxmamış pul istəyirdilər. Yəni demək istəyirəm ki, pulsuz heç kim, heç nə etmədiyi halda təqsirləndirilən şəxslər 23 min manatı niyə ödəyəcəklərini deyiblər? Hansı yolla? Çox maraqlıdır.Zərərçəkmişin başına gələnləri görürük. Bəlkə siz (təqsirləndirilən şəxslərə xitabən) işə qarışmasaydınız, bu kişinin həyat yoldaşı sağ qalacaqdı”.

APA-nın məlumatına göə, digər zərərçəkən Lamiyə Hüseynova isə söyləyib ki, Aysel Məmmədova ilə dayısının tövsiyə etdiyi həkim vasitəsi ilə tanış olub: "Mən 3 xəstəni əməliyyat üçün göndərmək istəyirdim. Dayımın tövsiyə etdiyi həkim vasitəsilə Aysel Məmmədova məni Nuridə Seyidovanın şirkətinə yöndləndirdi. Orada mən 3 nəfərə - Aysel, Nuridə və Turan adlı qadına ümumilikdə 20 min 50 manat verdim. Ümumi əməliyyatın pulu isə 41 min manat idi. Dedilər ki, qalanını onlar tamamlayacaqlar. Ondan da mənə xəstə yönləndirdiyim üçün pul verəcəkdilər. Lakin, sonradan Aysel Məmmədovaya nə qədər yalvardımsa, pulumu qaytarmadı. Gördüm heç nə olmur, bacımın bir otaqlı evini satıb xəstələri əməliyyat etdirdim. Banklara da borcum yarandı. Məndən Gəncə şəhər Baş Polis İdarəsinə şikayət də etdilər. Xəstənin yaxını hətta onları 2 ay gözlətdiyim üçün məni döydü. Daha sonra Aysel Məmmədovanın dayısı gəldi. Gücü çatan 6 min manat ödədi. Mən Aysel Məmmədovadan 55 min manat pul tələb edirəm"

Aysel Məmmədova isə həmin pulun bir qismini başqa xəstənin adına Mərkəzi Klinikaya köçürdüyünü, qalanını isə Nuridə Seyidovaya verdiyini söyləyib.

Prosesin davamında zərərçəkmiş Faiq Nəcəfov ifadə verib. Onun övladı talassemiyadan əziyyət çəkir. Əməliyyat üçün təqsirləndirilənlərə 5 min 100 manat verib. Həmin pul da xanım müttəhimlər tərəfindən ələ keçirilib: "Məndən istənilən puldan Nuridə Seyidovaya 3 min dollar verə bildim. Qalanını isə sponsorun ödəyəcəyini söylədilər. Mənə dedi ki, həmin sponsor adını bildirmək istəməyən bir biznesmendir. Daha sonra 2 min dollar da verdim. Həmin pulu adını çəkdiyim hər iki şəxsdən tələb edirəm".

Cinayət işindəki sənədlərdən müəyyən olunub ki, Faiq Nəcəfov Nuridə Seyidova ilə 2 müqavilə bağlayıb. Hakim Azad Məcidov müqavilə barədə Nuridə Seyidovaya sual ünvanlayıb: "Bu necə müqavilədir ki, nə pulun məbləği var, nə də başqa detal".

Proses yanvarın 22-də davam etdiriləcək.

Qeyd edək ki, talassemiya xəstələrinin valideynlərinə qarşı dələduzluq edilməsi ilə bağlı daxili işlər orqanlarına məlumat daxil olub. Məlumat əsasında cinayət işi başlanılıb. Müəyyən edilib ki, Nuridə Seyidova Aysel Məmmədova və Aynur Bayramova ilə əlbir olaraq 36 nəfər talassemiya xəstəsinin valideynlərinin etibarından sui-istifadə edərək həmin şəxslərin övladlarını Türkiyədə müalicə etdirmək adı ilə 980 min manatlarını mənimsəyib. Əvvəlcə Nuridə Seyidova həbs olunub. Daha sonra məhkəmə proseslərində Aynur Bayramova və Aysel Məmmədova barəsində həbs qətimkan tədbiri seçilib.

Təqsirləndirilən şəxslərə qarşı Cinayət Məcəlləsinin 178.3.2-ci (dələduzluq, külli miqdarda ziyan vurmaqla) maddəsi ilə ittiham irəli sürülüb.