SARKİSYANI KİM VƏ NİYƏ PARTLADIB? - Azərbaycanlı “qanuni oğru” da eyni yerdə qətlə yetirilmişdi

2023-cü ilin yayında əsasən ermənilərdən ibarət olan və Ukraynaya qarşı döyüşəcək “Arbat” batalyonunun yaradıldığına dair məlumat Rusiya mediasının əsas gündəm mövzularından birinə, onun yaradıcısı Armen Sarkisyan(Qorlovski) isə az qala “ulduz”a çevrilmişdi. Sonradan gözlənildiyi kimi, bu batalyonun hər hansı uğurlu əməliyyatı, şücaəti barədə heç nə eşidən olmadı və ortada həmişəki kimi arxasında ciddi bir şey olmayan erməni səs-küyündən başqa heç nə qalmadı. Sarkisyanın özünün “ulduzu” isə ötən gün Moskvanın şimal-qərbində yerləşən elit yaşayış komplekslərindən olan “Alıye Parusa”dakı binanın girişində söndü, daha doğrusu, söndürüldü…

Sarkisyan daha əvvəl Ukraynanın Qorlovka şəhərində yaşayıb və ləqəbi də (Qorlovski) həmin şəhərin adından götürülüb. Vaxtilə Ukrayna Prezidenti olmuş Viktor Yanukoviçə tulalıq etmiş bu şəxs öz kriminal dəstəsilə 2013-2014-cü illərdə dinc aksiyalarda ukraynalılara divan tutmaqla və bir ukraynalı jurnalistin qətlilə məşhurlaşıb. Onun adamları son günlərə qədər də işğal olunmuş Ukrayna ərazilərində talançılıqla və reketlə məşğul olub.

Sarkisyanın partladıldığı yaşayış kompleksi bizə həm də “Albert Rıjı” adı ilə tanınan azərbaycanlı “qanuni oğru” Əli Heydərovun qətlə yetirildiyi yer kimi tanışdır. Ə.Heydərov 2021-ci ilin aprelində “Alıye Parusa”dakı idman zalında məşq edərkən Mətləb Sultanov adlı şəxs tərəfindən güllələnmişdi. 

Bu qətlin kriminal aləm daxilindəki çəkişmələrin nəticəsi olduğu əvvəlcədən aydın idi. Eyni yaşayış kompleksində partladılan Sarkisyanın isə kim tərəfindən qətlə yetirildiyi hələlik rəsmən müəyən edilməyib. Lakin ekspertlərin, müşahidəçilərin əksəriyyəti bu aktın Ukrayna xüsusi xidmət orqanlarının əməliyyatı olduğunu güman edirlər. Baxmayaraq ki, Sarkisyanın kriminal aləmlə bağlılığı onun rəqibləri tərəfindən qətlə yetirilməsi versiyasını da istisna etmir…

Ancaq Rusiya mediası Sarkisyanın zatən bir qara qəpiklik dəyəri olmayan şəxsiyyətindən daha çox onun qətlinin Rusiya “FSB”-si daxilindəki çəkişmələrə təsir edə biləcəyindən yazır. Rusiya xüsusi xidmət orqanları ilə əlaqəsi olduğu heç bir şübhə doğurmayan Sarkisyanın qətli Ukrayna xüsusi xidmətinin bundan öncə Moskva şəhəri və Moskva vilayətində həyata keçirdiyi çoxsaylı əməliyyatlar zəncirinin növbəti həlqəsi sayılır. Bu isə Rusiya “FSB”-sinin Moskva şəhəri və Moskva vilayəti üzrə rəhbəri, general Aleksey Dorofeyevin növbəti uğursuzluğu, “çp”-si kimi qəbul olunur. 

Bunu tanınmış rusiyalı hüquq müdafiəçisi, araşdırmaçı, “Qulaqu net” layihəsinin yaradıcısı Vladimir Oseçkin də son efirində xüsusi vurğulayıb. O qeyd edib ki, bu hadisə “FSB” rəhbərliyində təmsil olunan və Dorofeyevin “yağlı” vəzifəsinə göz dikən, onunla münaqişədə olan Sergey Korolyov və Sergey Alpatov kimi generalları hərəkətə gətirib. Onun dediyinə görə, artıq bu qətldən demək olar, dərhal sonra “FSB” daxili təhqiqata başlayıb. Beləliklə, Sarkisyanın məhv edilməsindən Dorofeyevin rəqibləri onun “vurulması” üçün vasitə kimi istifadə edəcəklər.

Məsələ ondadır ki, “Krokus siti”-dəki terror aktı, ondan əvvəl Aleksandr Duqinin qızının olduğu avtomobilin partladılması və digər çoxsaylı hadisələr Dorofeyevin məsuliyyət daşıdığı bölgədə öz vəzifəsinin öhdəsindən gələ bilməməsi kimi qələmə verilir. “FSB” ilə əlaqəsi olan Sarkisyanın məhv edilməsi də bu sıraya yazılan növbəti “çp”-dir.

Bu, həm də o deməkdir ki, Sarkisyan kimilərin kriminal, qatil, avantürist personası və həyatı olsa-olsa kimlərinsə klandaxili savaşında alətdən, xırda detaldan başqa heç bir əhəmiyyət daşımır...

Beləliklə, əli ukraynalıların qanına bulaşmış, doğulub böyüdüyü ölkəyə - Ukraynaya qarşı namərdlik, satqınlıq etmiş Sarkisyanın “dövranı” layiq olduğu və gözlənildiyi şəkildə başa çatdı. Şübhəsiz ki, onun yaratdığı “Arbat”ı da eyni miskin aqibət gözləyir...

C.Məmmədov

“AzPolitika.info”