Ötən gün 2026-cı il dünya çempionatının qrup mərhələsində Belçika və İran yığmaları arasında keçirilən və 0:0 hesabı ilə başa çatan oyunun ən yaxşı futbolçusu İran millisinin qapıçısı Əlirza Beyranvənd seçilib.

Təbrizin "Traktor" klubunda çıxış edən qolkiper qarşılaşma ərzində komandasını doqquz dəfə real qol təhlükəsindən xilas edərək İranın vacib xal qazanmasında əsas rol oynayıb. Onun etibarlı oyunu Belçikanın hücumçularını çıxılmaz vəziyyətdə qoyub və matçın qəhrəmanına çevrilməsinə səbəb olub.

Bu görüş Beyranvəndin dünya çempionatlarındakı yeddinci matçı olub. O, mundiallarda keçirdiyi oyunlarda cəmi beş qol buraxıb, iki qarşılaşmada isə qapısını toxunulmaz saxlamağı bacarıb. Təcrübəli qolkiperin İran millisində ümumilikdə 88 oyunu var. Bu matçlarda o, 52 qol buraxıb və 45 dəfə "quru oyun" keçirməyi bacarıb.

1992-ci ildə dünyaya gələn Beyranvənd uzun illərdir İran millisinin əsas qapıçısı hesab olunur. Karyerası ərzində İranın Naft Tehran, Persepolis və Traktor klublarında çıxış edib. Legioner həyatı da yaşayan qapıçı Portuqaliyanın Boavista və Belçikanın Royal Antwerp komandalarının formasını geyinib.

Beyranvənd İran millisinin heyətində 2018 FIFA World Cup, 2022 FIFA World Cup və 2026 FIFA World Cup turnirlərində iştirak edib. O, dəfələrlə fərdi mükafatlara layiq görülüb və Asiya futbolunda ən tanınmış qapıçılardan biri hesab edilir.

İranlı qolkiper təkcə meydandakı çıxışı ilə deyil, rekordları ilə də diqqət çəkir. O, rəsmi futbol oyununda topu əllə ən uzaq məsafəyə atan qapıçı kimi ginnes rekorduna sahibdir. Beyranvəndin 78 metrlik atışı uzun müddətdir dünya rekordu kimi qalır. Beyranvəndin həyat hekayəsi isə futbol uğurlarından heç də az təsirli deyil. Kasıb ailədə böyüyən gələcək qapıçı yeniyetmə yaşlarında futbolçu olmaq arzusu ilə ailəsinin etirazına baxmayaraq Tehrana gedib. Maddi imkanları olmadığından uzun müddət küçələrdə, stadionların və məşq bazalarının yaxınlığında, hətta pizzaxanalarda gecələməli olub.

Bütün çətinliklərə baxmayaraq o, məşqlərini dayandırmayıb və addım-addım peşəkar futbola yüksəlib. Sonradan İranın ən böyük klublarında çıxış edən, milli komandanın əsas qapıçısına çevrilən və dünya çempionatlarında ölkəsini təmsil edən Beyranvənd bu gün həm də milyonlarla gəncin kumiri hesab olunur.

"AzPolitika.info"