DÜŞMƏNİ GÜLDÜRƏN “AĞSAQQAL MƏSLƏHƏTİ”... - Yaxud Eldar Quliyev “zavod çörəyi” yeyirmi?

Sanki kimsə bizim topluma “Sizi ağsaqqalsız qalasınız”, deyə qarğış edib. Həmin qarğış da deyəsən babatca tutub. Əgər belə olmasaydı, Eldar Quliyev kimi “dahi ictimai xadim” Azərbaycan Ağsaqqallar Şurasının sədri olmazdı...

“Vətəndaşlar bəzən lazım olmadığı halda 2-3 çörək alır, amma istifadə etmirlər. Yəqin ki, hər kəs şahidi olub: səhərlər qapılardan yarım və yaxud da bütöv dünəndən, srağagündən qalmış çörək qurusu asılır. Yəni ehtiyac olan qədər çörək almaq lazımdır, israfçılıqdan qaçmalıyıq. Dünya o dünya deyil, sudan da ehtiyatla istifadə edilməlidir. Atmosfer dəyişir, kənd təsərrüfatı həm də iqlimdən, təbiətdən asılıdır. Ona görə də təbiəti qorumaq, ehtiyatlı istifadəyə meyillənmək lazımdır. Gəlin çörəkdən, qidadan artıq alıb sonra xarab olduğu üçün heyvanlara verməyək”.

Bu deyilənlərdə həqiqət payı var. Ancaq görəsən, Eldar Quliyev nədən bu məsləhətini un, çörək bahalaşmadan öncə vermirdi?...

Bəlkə də bunu özü ortabab dolanan, tez-tez üzdə də olsa camaatın halına yanan, kasıb-kusubu müdafiə edən, xalqın sayıb-seçdiyi birisi çıxıb desəydi, camaatda bu qədər kəskin reaksiya, qəzəb doğurmazdı. Ancaq bu “məsləhəti” “bir əli yağda, bir əli balda” yaşayan, 5 dəfə(!) deputat “seçilən”, eyni zamanda da Azərbaycan Kooperasiya Universiteti başda olmaqla, xeyli “obyektin”, mülklərin, var-dövlətin sahibi olan, özü uzun illərdir bəlkə də “zavod çörəyi”ni bəyənmədiyindən yaxına da buraxmayan, onun qiymətini belə bilməyən birisi verəndə, kasıb əhalinin bunu ağsaqqal məsləhəti yox, az qala söyüş kimi qəbul etməsi təbiidir...

Xatırladaq ki, Azərbaycan ağsaqqallarının rəsmi “lideri” olan bu şəxs dördcə ay əvvəl benzin bahalaşanda da öz “ağsaqqal məsləhəti”ni xalqdan əsirgəməmişdi: "Şanlı Azərbaycan kifayət qədər iqtisadi gücə malikdir, amma bizim ABŞ-da olduğu qədər milyardlarımız yoxdur. Nəzərə almaq lazımdır ki, 15 qəpiklə heç kim kasıblamaz..."

Məntiqlə indi də durub deməliydi ki, “unun kisəsi 10 manat, çörək isə 15 qəpik bahalaşmaqla, kimsə kasıblamaz”.

Ancaq görünür, keçən dəfəki “şedevr” fikrindən sonra ünvanına yağan “minnətdarlıq mesajları” bu dəfə onu bir qədər fərqli danışmağa vadar edib...

Onu da qeyd edək ki, son fikirlərilə xalqı təkcə israfçılıqda yox, həm də acgözlükdə, görməmişlikdə günahlandırmış olan bu şəxsin açıqlamaları erməni mətbuatında da tirajlanmaqda, ələ salınmaqdadır. Özünü də lağ obyektinə çevirib, bizi də - düşmən sevindirən “el ağsaqqalı”!...

Xatırladaq ki, elə də uzaq olmayan keçmişdə Fransa fahişəxanasındakı qadınla söhbətlərindən sitat gətirməsilə tanınan həmin bu deputatımız(!) həm də iqtisad elmləri doktoru və professordur. Və Norveç Nobel Komitəsinin böyük haqsızlıq edərək unutduğu və hələ də ödülləndirmədiyi bu “misilsiz” iqtisadçı-alimin az qala unun qiymətinin qalxmasını əhalinin "çörək israfçılığı", vəziyyətdən çıxış yolunu isə çörəyə qənaətdə görməsi də başqa bir aləmdir...

Söhbət Fransadan düşmüşkən, xalqdan, onun dolanışığından, real həyatından uzaq düşmüş Fransa kraliçası Mariya Antuanetta ilə bağlı bir rəvayət var. Ona xalqın yeməyə çörək tapmadığını deyəndə, “Çörək tapa bilmirlərsə, tort yesinlər” deyibmiş.

Eldar Quliyev kimi kefinə kef çatmayanların kasıb camaata çörəklə bağlı məsləhət verməsi də buna bənzəyir.

Doğrudur, Mariya Antuanetta ağbirçək yaşına çatmamış həyatla vidalaşmalı olmuşdu, onu edam etmişdilər. Ancaq yaradanın bizə “lütfüdür” ki, Eldar müəllim kimi ağsaqqalımız yaşayır, yaşayacaq və öz “ağsaqqal məsləhətləri”ni hələ uzun müddət bizdən əsirgəməyəcək...

Cəlal Məmmədov

“AzPolitika.info”

635x100

Şərhlər

Aborigen 2022-01-15 10:41:39

"Vətəndaşlar bəzən lazım olmadığı halda 2-3 çörək alır, amma istifadə etmirlər." Ya bu adamın elə başa düşdüyü budur, ya da sadəcə olaraq bu milləti ələ salır. Necə yəni artıq alıb istifadə etmirlər. hansı anormal adam gündəlik ehtiyacı olan və istənilən vaxt əldə edə biləcəyi çörəyi artıq alıb xarab eləyər? Belə hallar epizodik olaraq ola bilər. Daha bunu çörəyin bahalaşmağının səbəbi kimi göstərmək düşüncə kasadlığıdır.

Roma 2022-01-12 13:06:56

Mən, Eldar Quliyevin dedikləri ilə razı deyiləm və onun dedikləri həqiqəti əks etdirmir. Belə ki, Sovet dönəmində, "hörmətli Professorun" dediyi kimi boyat çörəyi az qalırdı tapdayaq, ancaq indi belə hal yox dərəcəsindədir, şəxsən mən qarşılaşmıram...2-cisi lap tutalım Siz deyən kimidir, bunu kasıb təbəqə edə bilməz, elə ailələr var ki, yavan çörəyə möhtacdırlar...

Camaat 2022-01-07 17:02:42

Eldarsan-nəsən bilmirəm.Sənin kimiləri.....

Xəqani 2022-01-06 15:17:59

ALLAH sənə ağıversin ay belıy boroda...

Orxan Vəliyev 2022-01-06 13:24:51

Bu neçə vəzifə daşıyır və bu vəzifələri nə zaman ,harada və necə yerinə yetirə bilər? Gülməli deyilmi?Ölkədə kadr tapılmır?

Roma 2022-01-06 12:49:12

Eldar Quliyev eyni zamanda yaradıcılıqla da məşğul olur. Belə ki, onun bir neçə şeirlərinə bir vaxt rast gəlib oxumuşdum...məsələn, "Qarağac", sonra bir şeirini də oxudum, yadımda qalmayıb adı, nə isə...

Samir 2022-01-06 11:56:36

..... tez tez Ramiz Mehdiyevi, agsaqqalı adlandıran Eldar Quliyevin MM- də olması belə dövlətə, millətə utancdır...

Vətəndaş 2022-01-06 11:38:16

Sol döşündə azırbaycan ordenləri bəs sağ döşündəki xaç ordenləri nədir?

Niyaməddin 2022-01-06 11:07:13

Acın amanı yox, toxun imanı. Allah bunların belini qırsın. Məmləkəti zəlil edib, düşməni güldürənlərdir bunlar.

RR 2022-01-06 11:01:20

Allah belani verer inshallah )))

Qalib 2022-01-06 10:56:03

Çörək nəyə görə çəki ilə satılmır? Çörəyin 1 kq-ı neçəyədir?

Vətəndaş 2022-01-06 10:34:10

Adam yaşlananda saç ağarması təbiidir. Bu adam kraskadan ayrıla bilmir. Ağsaqqallar şurasının sədridir.....

Təngə gəlmiş 2022-01-06 10:07:50

Bunun kimilərə Ağsaqqal kəlməsi yox, ......daha uyğundur. Ayıbdır Ağsaqqal sözünü.....Əlbəttə bunun kimi var dövlətinin sayını hesabını bilməyənin nə vecinə benzin qalxdı ya çörək yada bir başqası.

Son yazılar