Bu gün yayılan məlumata görə, 27 milyon manatlıq mənimsəmədə təqsirli bilinən sabiq əmək və əhalinin sosial müdafiəsi naziri Səlim Müslümovun müsadirə edilmiş evi və obyekti satışa çıxarılır.

Onun bu  iki əmlakının ümumi satış qiymətinin 1 milyon 376 min manat təşkil etdiyi bildirilir..

- Yasamal rayonu, Mirzə İbrahimov küçəsində 370,4 kv.m sahəsi olan yaşayış evi, satış qiyməti: 926 250 manat;

- Səbail rayonu, Azadlıq prospektində qeyri-yaşayış sahəsi, satış qiyməti: 450 000 manat.

Məlumatda ötən ay da onun 490 min manata iki mənzilinin satışa çıxarıldığı qeyd olunur. Səlim Müslümov isə bu haqda hər hansı açıqlama verməyib. Yəqin ki, bundan sonra verməyıəcək.

Yada salaq ki, Səlim Müslümov 2024-cü ildə 11 il şərti cəza verilərək azadlığa buraxılanda, bunu özü üçün humanist hökm kimi qəbul etmiş, həmçinin əmlaklarının müsadirə edilməsinə etiraz etməmişdi.

Həmin vaxt Müslümovdan dövlət nəfinə alınacaq əmlakların siyahısı belə idi:

- Binəqədi rayonu, Akademik Ziya Bünyadov prospektində yerləşən iki mənzil;

- Səbail rayonu, Azadlıq prospektində yerləşən qeyri-yaşayış sahəsi;

- Bakı şəhəri, Yasamal rayonu, Mirzə İbrahimov küçəsində mənzil;

- Nərimanov rayonu, Oqtay Kərimov küçəsində iki ev;

- Nərimanov rayonu, Məmməd Araz küçəsində ev;

- Binəqədi rayonu, 6-cı mikrorayonda yerləşən 500 və 300 kv.m torpaq sahələri;

- Bakı şəhəri, Xətai rayonu, Rəsul Rza küçəsində yerləşən 300 kv.m olan qeyri-yaşayış sahəsi.

Müslümov o vaxt hökmdən apellyasiya şikayəti də verməmişdi. Görəsən, niyə?...

Məsələ ondadır ki, 11 il DSMF rəhbəri, 5 il Əmək və əhalinin sosial müdafiəsi naziri vəzifəsini tutmuş bu şəxs cəmi 27 milyon manatlıq mənimsəmədə təqsirli bilinmişdi. Yəni, 16 il(!) ölkənin sosial müdafiə və pensiya sisteminin başında duran, bu qurumlara rəhbərlik etdiyi dövrdə əlinin altından üst-üstə 10 milyardlarla dövlət vəsaiti gəlib keçən klassik korrupsioner nazirin 16 ildə cəmi 27 milyon mənimsədiyi iddia olundu. Bu, ilə təxminən 1.5 milyon manat demək idi.


Bilənlər bilir ki, həmin illərdə bu məbləği, hətta ondan da artığını 1 ilə yox, 1 aya mənimsəmək Müslümov kimilər üçün “su içmək” qədər asan olub. Deməli, real talançılığın miqyası da 27 milyondan 10 dəfələrlə, bəlkə də daha artıq çox olub!

Əlbəttə, o cür iri miqyaslı mənimsəmənin cəmi 27 milyonla(onun da 20 milyonu əmlakla əvəzlənir) “başının bağlanması” çox sərfəlidir və heç bir appelyasiya şikayəti verməyən, əvəzində 3-5 əmlakının siyahısını təqdim etməklə yaxasını kənara çəkən Müslümovu başa düşmək asandır. Doğrudur, onun yalnız əmlaklarla “canını qurtarmadığına” dair də söhbətlər gəzirdi. Ancaq istənilən halda, adam etdiyini edib, mənimsənilənlə əvəzində ödənilən məbləğlərin bir-birini tam bağlaması və bu məbləğlərin tam olaraq büdcəyə qaytarılması qətiyyən inandırıcı deyil…

Lakin Müslümovun büdcəyə, dövlət vəsaitlərinə vurduğu ziyan onun “banisi olduğu” və əhalinin kasıb, imkansız təbəqəsi üçün əsl cəhənnəm kabusuna çevrilən “pensiya sistemilə” müqayisədə heç nədir! Zatən büdcənin pullarını Müslümov olmasa, başqa birisi talayacaqdı, necə ki, ondan əvvəl də, sonra da talanıb. Camaat artıq buna “adətkərdədir”.


Ancaq onun təməlini qoyduğu pensiya hesablanması sistemi bu əhalinin başına elə bir oyun açıb, cəmiyyətdə elə bir əcaib pensiya bölgüsü, nəticədə də ədalətsizlik, təbəqələşmə yaradıb ki, buna görə nəinki şərti cəza, əmlak müsadirəsi və s. az qala ömürlük həbs cəzası da yüngül cəza sayılmalıdır.

Ömrünün böyük hissəsini ağır işlərdə keçirən fəhlə-kəndli təbəqəsi, eləcə də müəllim, alim, həkim və s. ziyalı təbəqəsinə aid insanlar ahıl yaşlarında lənətə gəlmiş “pensiya kapitalı”nı doldurmadıqları bəhanəsilə 320 manata möhtac qoyulublar. Ya da “bəxti gətirənlər” bundan bir az çox – 350-450 manat pensiya ala bilirlər. Əvəzində, bütün ömrünü yüksək və yağlı vəzifələrdə keçirən məhkəmə hakimləri, prokurorlar, polis rəisləri, deputatlar və digər bu qəbildən olanlar 10-20 qat daha çox pensiya alırlar. Üstəlik, hələ bundan da narazılıq edərək, müvafiq nazirliyi məhkəməyə verib, dövlətdən daha artığını tələb edir və təbii ki, məhkəmələri də udurlar. Yəni, zatən pularını “balta kəsməyən”, saysız-hesabsız mülkləri, biznesləri, bank hesabları olan adamlar pensiyaya çıxandan sonra da nə dövlətin, nə də millətin yaxasından düşmürlər.

Bunun üçün qanuni əsas yaradanlar isə Müslümov kimilər və onların hazırladıqları mürtəce qanunları parlamentdə təsdiqləyən deputatlardır. Acınacaqlı həm də odur ki, Müslümovdan sonra gələnlər başda olmaqla, heç kim bu haqsızlığı aradan qaldırmaq istəmir…


Müslümovla bağlı məhkəmə qərarında deyilir ki, o, şərti cəza müddətində ölkədən çıxa bilməz. Buna nə dərəcədə əməl edildiyini deyə bilmərik, çünki Azərbaycanın hüquq-mühafizə, məhkəmə, məhkəmə qərarlarının icrası sistemində hər şey mümkündür. Amma əslində əhalinin ahıl, imkansız kəsimini qəpik-quruşa məhkum edən, möhtac qoyan bunun kimilər nəinki ölkədən çıxmağa, heç ümumiyyətlə, insan arasına çıxmağa layiq deyillər…

Cəlal Məmmədli

“AzPolitika.info”