Xəbər verdiyimiz kimi, bu gün Azərbaycan Prezidenti İlham Əliyev Xalq rəssamı, tanınmış boyakar Fərhad Xəlilova ölkənin ali mükafatlarından biri olan "İstiqlal" ordenini təqdim edib. Təqdimat mərasimində dövlət başçısı Xalq rəssamını təbrik edərək onun Azərbaycan təsviri sənətinin inkişafındakı xidmətlərini yüksək qiymətləndirib.
Qeyd edək ki, bu ali Orden 1992-ci il noyabrın 10-da qəbul edilmiş qanunla təsis olunub, onun statutunu isə mərhum prezident Heydər Əliyev 1993-cü il dekabrın 6-da təsdiqləyib.
Heydər Əliyevin prezidentliyi dövründə “İstiqlal” ordeni ilə təltif olunanların siyahısında ilk üç nəfər Xəlil Rza Ulutürk, Məmməd Araz və Bəxtiyar Vahabzadə olub. Onlar 1995-ci il aprelin 15-də ordenlə təltif ediliblər. Xəlil Rza Ulutürk ölümündən sonra mükafata layiq görülüb.
Sonrakı illərdə Mirvarid Dilbazi, Anar, İsa Hüseynov, Allahşükür Paşazadə, eləcə də bəstəkar Tofiq Quliyev, rəssamlar Tahir Salahov, Kamil Əliyev, müğənni Əminə Dilbazi və digər görkəmli mədəniyyət xadimləri ordenlə təltif ediliblər.
Prezident İlham Əliyevin hakimiyyəti dövründə isə bu ali mükafata layiq görülən icitmai-siyasi, mədəniyyət incəsənət xadimlərinin siyahısı daha genişdir. Qeyd edək ki, 2003-cü ildə "İstiqlal" ordeni ilə təltif barədə bəzi sərəncamlar Heydər Əliyevin prezidentliyi dövründə imzalanıb, 2003-cü ilin oktyabrından sonra isə bu proses Prezident İlham Əliyevin rəhbərliyi ilə davam etdirilib.
Açıq mənbələrin və rəsmi sərəncamların təhlili göstərir ki, bu illərdə aşağıdakı tanınmış şəxslər təltif olunublar:
Elçin Əfəndiyev - 2003 (Heydər Əliyevin sərəncamı ilə təltif edilib; orden və vəsiqə 2005-ci il mayın 13-də İlham Əliyev tərəfindən təqdim olunub)
Polad Bülbüloğlu - 2005 (Azərbaycan mədəniyyətinin inkişafındakı xidmətlərinə görə)
Vasif Adıgözəlov - 2005 (Azərbaycan musiqi mədəniyyətinin inkişafındakı xidmətlərinə görə)
Qabil İmamverdiyev (Qabil) - 2006 (Azərbaycan ədəbiyyatının inkişafındakı xidmətlərinə görə)
Zeynəb Xanlarova - 26 dekabr 2006 (Azərbaycan musiqi mədəniyyətinin inkişafı və təbliğindəki xidmətlərinə görə).
Sonrakı illərdə “İstiqlal” ordeni ilə aşağıdakı şəxslər təltif olunublar:
Mirməmməd Cavadzadə - 18 may 2007 (Səhiyyə / Elm)
Qabil Əliyev - 18 may 2007 (Ədəbiyyat)
Arif Babayev - 15 fevral 2008 (Mədəniyyət və incəsənət)
Ramiz Mehdiyev - 17 aprel 2008 (Dövlət idarəçiliyi)
Fuad Qasımzadə - 30 oktyabr 2009 (Elm və fəlsəfə)
Əlibaba Məmmədov - 3 fevral 2010 (Mədəniyyət və incəsənət)
Arif Paşayev - 14 fevral 2014 (Elm və təhsil)
Akif Əlizadə - 25 fevral 2014 (Elm)
Vaqif Səmədoğlu - 5 iyun 2014 (Ədəbiyyat)
Rasim Əliyev - 16 iyul 2014 (Memarlıq)
Fidan Qasımova - 16 iyun 2017 (Mədəniyyət və incəsənət)
Rauf Abdullayev - 28 oktyabr 2017 (Mədəniyyət və incəsənət)
Fərhad Bədəlbəyli - 26 dekabr 2017 (Mədəniyyət və incəsənət)
Fəttah Heydərov - 22 fevral 2018 (Dövlət və ictimai fəaliyyət)
Fikrət Qocayev - 24 avqust 2020 (Ədəbiyyat)
Eldar Quliyev - 23 yanvar 2021 (Kino sənəti)
Nəriman Həsənzadə - 17 fevral 2021 (Ədəbiyyat)
Xuraman Qasımova - 5 iyun 2021 (Mədəniyyət və incəsənət)
Fatma Səttarova - 24 yanvar 2022 (İctimai fəaliyyət / Veteran)
Oqtay Mirqasımov - 12 iyun 2023 (Kino sənəti)
Rasim Balayev - 7 avqust 2023 (Kino və teatr sənəti)
Şəfiqə Məmmədova - 29 mart 2025 (Mədəniyyət və teatr sənəti)
Yaqub Eyyubov - 22 oktyabr 2025 (Dövlət idarəçiliyi)
Cəmil Əliyev - 29 mart 2026 (Səhiyyə və tibb elmi)
Fərhad Xəlilov - 23 oktyabr 2026 (Təsviri sənət / Rəssamlıq)
Təltif olunanlar arasında mədəniyyət, incəsənət və ədəbiyyat xadimləri əsas üstünlük təşkil edir. Eyni zamanda elm, səhiyyə və dövlət idarəçiliyi sahələrinin görkəmli nümayəndələri də bu ali mükafata layiq görülüblər.
Qeyd edək ki, 2011–2013-cü illərdə, eləcə də 2015–2016 və 2019-cu illərdə bu siyahıda yeni təltif qeydə alınmayıb. Son dövrlərdə ölkə rəhbərliyi tərəfindən mədəniyyət və səhiyyə xadimlərinin fəaliyyətinə verilən yüksək qiymət diqqəti cəlb edir - 2025-ci ildə Şəfiqə Məmmədova və Yaqub Eyyubov, 2026-cı ildə isə əvvəlcə Cəmil Əliyev, indi isə Xalq rəssamı Fərhad Xəlilov "İstiqlal" ordeni ilə təltif olunublar.
Rasim Əliyev
“AzPolitika.info”
Şərhlər